ദുബായ്: ആഫ്രിക്കന്‍ രാജ്യങ്ങളില്‍ എബോള (Ebola) വൈറസ് വ്യാപനം റിപ്പോര്‍ട്ട് ചെയ്തതിനെത്തുടര്‍ന്ന് യുഎഇ ഉള്‍പ്പെടെയുള്ള രാജ്യങ്ങള്‍ യാത്രാ നിയന്ത്രണങ്ങള്‍ കടുപ്പിച്ചു. ഇതിന്റെ ഭാഗമായി യുഎഇയിലെ പ്രമുഖ വിമാനക്കമ്പനികളായ എമിറേറ്റ്സും (Emirates) ഫ്ലൈദുബായും (flydubai) അന്താരാഷ്ട്ര യാത്രക്കാര്‍ക്കായി അടിയന്തര ജാഗ്രതാ നിര്‍ദ്ദേശം പുറപ്പെടുവിച്ചു.

ജൂണ്‍ 6 ഉച്ചയ്ക്ക് 1 മണി മുതല്‍ പുതിയ നിയന്ത്രണങ്ങള്‍ യുഎഇയില്‍ പ്രാബല്യത്തില്‍ വന്നതായി എമിറേറ്റ്സ് വെബ്സൈറ്റ് വ്യക്തമാക്കുന്നു.

പ്രധാന യാത്രാ നിയന്ത്രണങ്ങള്‍ ചുരുക്കത്തില്‍:

പ്രവേശന വിലക്കുള്ള രാജ്യങ്ങള്‍: ഡെമോക്രാറ്റിക് റിപ്പബ്ളിക് ഓഫ് കോംഗോ, ഉഗാണ്ട, ദക്ഷിണ സുഡാന്‍ എന്നീ രാജ്യങ്ങള്‍ സന്ദര്‍ശിച്ച യാത്രക്കാര്‍ക്ക് യുഎഇയിലേക്ക് നേരിട്ട് പ്രവേശനമുണ്ടാകില്ല.

21 ദിവസത്തെ ക്വാറനൈ്റന്‍ നിബന്ധന: വിലക്കുള്ള രാജ്യങ്ങളില്‍ നിന്ന് വരുന്നവര്‍ യുഎഇയില്‍ എത്തുന്നതിന് മുന്‍പ്, എബോള ബാധയില്ലാത്ത മറ്റൊരു രാജ്യത്ത് കുറഞ്ഞത് 21 ദിവസങ്ങളെങ്കിലും താമസിച്ചിരിക്കണം. മറ്റ് രാജ്യങ്ങള്‍ വഴി കണക്റ്റിങ് ഫ്ലൈറ്റുകളില്‍ (Transit) എത്തുന്നവര്‍ക്കും ഈ നിയമം ബാധകമാണ്.

ട്രാന്‍സിറ്റ് യാത്രക്കാര്‍ക്ക് നിര്‍ദ്ദേശം: യുഎഇ വഴി മറ്റ് രാജ്യങ്ങളിലേക്ക് പോകുന്ന ട്രാന്‍സിറ്റ് യാത്രക്കാര്‍, തങ്ങള്‍ ഒടുവില്‍ എത്തിച്ചേരേണ്ട ലക്ഷ്യസ്ഥാനത്തെ (Destination) പ്രവേശന നിയമങ്ങള്‍ കൃത്യമായി പാലിച്ചിട്ടുണ്ടെന്ന് ഉറപ്പുവരുത്തണം.

എയര്‍പോര്‍ട്ടുകളില്‍ കര്‍ശന പരിശോധന: എബോള ലക്ഷണങ്ങള്‍ കണ്ടെത്തുന്നതിനായി യുഎഇ വിമാനത്താവളങ്ങളില്‍ തെര്‍മല്‍ സ്ക്രീനിംഗ് ഉള്‍പ്പെടെയുള്ള മെഡിക്കല്‍ പരിശോധനകള്‍ ശക്തമാക്കിയിട്ടുണ്ട്.

വിവിധ രാജ്യങ്ങള്‍ എബോള മുന്‍കരുതലുകള്‍ എടുത്ത സാഹചര്യത്തില്‍, യാത്രക്കാര്‍ തങ്ങളുടെ ഫ്ലൈറ്റ് പുറപ്പെടുന്നതിന് മുന്‍പ് ഔദ്യോഗിക സര്‍ക്കാര്‍ ചാനലുകള്‍ വഴി പ്രവേശന മാനദണ്ഡങ്ങള്‍ പരിശോധിച്ച് ഉറപ്പുവരുത്തണമെന്ന് എമിറേറ്റ്സും ഫ്ലൈദുബായും ആവശ്യപ്പെട്ടു. അടുത്ത അറിയിപ്പ് ഉണ്ടാകുന്നത് വരെ ഈ നിയന്ത്രണങ്ങള്‍ തുടരും.